ភ្នំពេញ៖ អតីតប្រធានប្រតិបត្តិគណបក្សភ្លើងទៀននៅភ្នំពេញ លោក ស ឡុងដេត ត្រូវបានតែងតាំងជាទីប្រឹក្សារាជរដ្ឋាភិបាលមានឋានៈស្មើអនុរដ្ឋលេខាធិការក្រោយពីលោកបានសុំទោសនាយករដ្ឋមន្ត្រីនិងសូមចុះចូលជាមួយនឹងគណបក្សប្រជាជន។
ក្នុងព្រះរាជក្រឹត្យចុះថ្ងៃទី១៥ ខែមិថុនា ឆ្នាំ២០២៣ ព្រះមហាក្សត្រកម្ពុជា សម្ដេចព្រះបរមនាថ នរោត្តម សីហមុនីបានត្រាស់បង្គាប់ តែងតាំងលោក ស ឡុងដេត និងលោក ឡុញ រតត្រា ជាទីប្រឹក្សារាជរដ្ឋាភិបាល។
លោក ស ឡុងដេត មានឋានៈស្មើអនុរដ្ឋលេខាធិការ ខណៈលោក ឡុញ រតត្រា មានឋានៈស្នើអគ្គនាយក។
ការសព្វព្រះរាជហឫទ័យតែងតាំងអ្នកទាំងពីរនេះគឺបន្ទាប់ពីលោក ស ឡុងដេត បានចេញវីដេអូសុំទោសសម្តេចតេជោ ហ៊ុន សែន នាយករដ្ឋមន្ត្រី និងប្រកាសផ្តាច់ខ្លួនពីបុគ្គល សម រង្ស៉ី ព្រមទាំងស្នើសូមចូលរួមជីវភាពនយោបាយជាមួយគណបក្សប្រជាជនកម្ពុជា។
វីដេអូសុំទោសរបស់លោក ស ឡុងដេត ធ្វើឡើងក្រោយសម្ដេចតេជោ ហ៊ុន សែន ថ្លែងក្នុងពិធីជួបជាមួយនិងកម្មករជិត ២ម៉ឺននាក់ក្នុងខណ្ឌពោធិ៍សែនជ័យរាជធានីភ្នំពេញព្រឹកថ្ងៃទី១៣ ខែមិថុនា ឆ្នាំ២០២៣នេះ ដោយហៅប្រធានក្រុមការងាររាជធានីភ្នំពេញគណបក្សភ្លើងទៀន លោក ស ឡុងដេត ឱ្យត្រឡប់មករាជធានីភ្នំពេញវិញខណៈដែលខំព្យាយាមរត់គេចទៅប្រទេសថៃតែមិនទាន់បានសម្រេច៕
